आयुष्य.. म्हणजेच सहजसुंदर देवाणघेवाण !

आयुष्य..

नदीला फिरताच येत नाही मागे 

म्हणुनच ती वहात जाते आवेगाने..

समुद्राच्या मिठीत स्वः अस्तित्व विसरायला!!

त्याच्या मनाची खोली कधीही मोजता न येणारी 

तिच्या सारख्या अनेकींचे विश्व व्यापून टाकणारी 

एवढी विशालता त्याच्या निस्सीम अथांगतेला!!

तरीही त्याला कधीच वाढवता येत नाहीत त्याच्या मर्यादा

चौकटीतील आयुष्य तो नाकारू शकत नाही.

त्याची शांतता हे नक्की कशाचे प्रतीक समजावे..?

नदी असते खळखळणारी..

प्रवाहा सोबत आनंद वाटणारी..

आपला गोडवा समुद्राला देऊन 

त्याचे खारेपन सहज स्विकारणारी..

दोघेही संपूर्ण, एकमेकांना समर्पक 

एकमेकात मिसळून सुद्धा 

आपलेपण जपणारी..

तिने कधीच स्वतःला बदलले नाही 

आणि त्याने कधीही तसा अट्टाहास धरला नाही..

तिने झोकून दिले नि त्याने सहज स्विकारले..!!

ही सहजसुंदर देवाणघेवाण म्हणजेच आयुष्य..!!

                                                  - तेजश्री शिंदे