बोन्साय...खुरटया विचारांचे वृक्ष !

 

 बोन्साय 

विवाह संस्थेचे बुजगावणे होऊन 

माझ्या समोर ती बसली येवून..

जिच्या शिक्षणाची तलवार 

झाली होती बोथट,

जी गहाण ठेवून आली होती 

आपली विवेकबुद्धी,

आणि विचारात होती प्रश्न 

स्वतःच्याच प्रतिबिंबावर.

मी अशी नव्हते हो....तिचा हा टाहो, 

अस्तित्वाची घालमेल नि विचारांचा गुंता 

सर्वच साशंकित...?

तुझे असे बोन्साय होत जाणे 

नाही ग पहावत, 

उघड तुझे पंख नि 

घे मोकळा श्वास,

सृष्टीच्या निर्मिकावर 

ठेव थोडा विश्वास,

परतून यायला आता 

घरटेच नाही.. 

ही पराभूत जाणीव,

भिरकावून देत..

तू निर्माण कर स्वतःची वाट 

तेव्हाच होईल स्वत्वाची पहाट

धीर धर जरा..

नि उचल पहिले पाऊल,

कणा अभिमानाने बोलू लागेल 

मी बोन्साय नाही...!

         

                                   - तेजश्री शिंदे✍️