माहीर (कविता)

 माहीर..

रोखला नयनात माझ्या तो यातनांचा पूर होता

   पायात थिजलेल्या माझ्या भावनांचा जोर होता 

    पसरला चारी दिशांना तो केवड्याचा सुगंध होता 

          कुस्करलेल्या मोगऱ्याला माझ्या जाणिवांचा गंध होता 

अंधारल्या रात्रीचा तो केविलवाणा प्रयास होता 

     उजळलेल्या पायवाटा माझ्या जीवनाचा सार होता 

तुझ्या पहिल्या भेटीचा तो फुललेला शहारा होता

 चांदण्यात रेंगाळणारा तो माझा चकोर होता       

बहरलेल्या प्रीतीचा तो झुलता मनोरा होता         

     उसळलेल्या सागराला माझ्या यौवनाचा दुजोरा होता 

उसवलेल्या विचारांना तो सांधणारा माहीर होता

शब्दात वेढलेल्या माझ्या जखमांचा शाहीर होता 

                                                 - तेजश्री शिंदे ✍️