ओनामा (Onama)

हा खेळ माझा नव्हे.. वाटते मला असे की, हे शब्द माझे नव्हे  गुंतलेल्या या शरीरातील, हे प्राण माझे नव्हे.. सोसलेल्या वेदनांची, देणी-घेणी बरीच बाकी  मांडला तो सारा हिशोब, हा खेळ माझा नव्हे.. व्यक्त झाल्या भावनांचा, अर्थ गहिरा दाटला  घेतला जो तू मनात, तो सार माझा नव्हे.. गुंफलेल्या जाणिवांची, माळ कोणी सांधली छेडलेल्या त्या स्वरातील, तो सूर माझा नव्हे..                                                                                                    - तेजश्री शिंदे 

पाऊस   पावसाची कविता की,  कवितांचा पाऊस  बेभान मनाचा उसळता,  आठवणींचा पाऊस.. कडाडत्या विजांचा,  शब्द वेदनेचा पाऊस  गहिवरल्या भावनांचा,  चिंब भिजलेला पाऊस.. कोंडलेल्या मनाचा,  ओल्या जखमांचा पाऊस  अवकाळी कोसळणारा,  शब्दगारांचा पाऊस.. आभाळ भरून आलेला  नेत्र धारांचा पाऊस प्रेयसीला साद घालणारा, व्याकुळ मनाचा पाऊस.. सैरभैर विचारांचा, गोंधळलेला पाऊस  मृदगंधातून अंकुरित होणारा, सृजन सोहळ्याचा पाऊस..!                                            - तेजश्री शिंदे 

  संभ्रम शाश्वत.. अढळ असे काही नसतेच  आणि हे सगळे एक दिवस संपणारच  ही घाबरून सोडणारी भावनाच  तिच्या आत्मविश्वासाच्या उडवतेय  चिंधड्या चिंधड्या..! तिला होताच येत नाही स्वार विचारांचा हा आत्मघातकी स्वैराचार काहूर माजवतोय मनाचा भ्रष्टाचार तिच्यातील 'मी'ला करून स्तब्ध  उसळतोय संभ्रमांचा दुराचार..! 'ती' महाभारतातील गांधारी, सुभद्रा, कुन्ती अथवा दमयंती, ती रामायणातील कौशल्या, ऊर्मिला, सुमित्रा अथवा मंदोदरी..!                                            - तेजश्री शिंदे 

बोध   कविता आणि प्रेम या दोनच गोष्टी आहेत, जिथे मला 'मी' माणूस होण्याचा बोध होतो. अविरत चालत राहणार्‍या या प्रवासात, मी शून्यवत होत चालल्याचा भास होतो.  विचारांच्या गर्तेत अडकलेल्या आयुष्यात, घडणार्‍या घटनांवर अविश्वासाचा ठराव होतो.  बोथट भावनांचा पूर अन शोधार्थाची परिक्रमा, माझ्याच समुद्रमंथनातून अविचारांचा र्‍हास होतो. नवअंकुरित आत्मबीजाचा स्वार्थत्याग करत, शांतीच्या गर्भात नव जाणिवांचा उषःकाल होतो. माझ्यात पुन्हा पुन्हा 'मी' माणूस असल्याचा बोध होतो.                                                       - तेजश्री शिंदे